(向史兄致敬，開個系列放下以前的有趣作品)
(原文在此，2008年作品)
(Wong Chia Chi's Theme—《色．戒》插曲)
[《食市論壇》現場]
謝似峰﹕「最近街上派發免費食物越來越多，無論甜、酸、苦、辣、鹹都引起公眾關注。我地《食市論壇》今日既題目係『免費食物要妥當，大眾齊論保周詳』，先介紹台上嘉賓。」
謝﹕「坐o係最左手邊既，係環保先鋒主席吳浪費。」(嘉賓如次點頭，下同)
「佢右手邊一位，係道德重整會會長海至深。」
「再過黎既，係食品製造商協會主席梨志櫻。」
「o係我左手邊既，係教師協會副會長蔣智光。」
謝﹕「台下有來自杏壇中學既老師同學生。」(起立致意，下同)
「有飲食自由關注組既代表。」
「仲有青年飲餞聯既代表。」(噓聲四起)
謝﹕「o拿，食市論壇係歡迎任何人發言既，請各位互相尊重。如果你唔畀其他人發言，咁我都唔使畀你發言架勒。我地首先請環保先鋒主席吳浪費。」
吳﹕「我地一路都好關注廚餘問題，一直都呼籲市民如果唔食得多就要叫『少飯』，節約資源。但係近來d人周街派野食，令市民貪心一人拎幾份，食唔晒就倒落垃圾桶，加重堆填區負擔。就算你食得晒，都食得多痾得多，污染海港啦﹗仲有d人專登拎幾份黎整堆肥，要肥料點解唔用自己d便便呢﹖如果有市民唔夠便便既話，就應該去睇醫生，睇下自己係咪便秘。咁樣自己同地球都會健康好多。」
謝﹕「有請教師協會副會長蔣智光。」
蔣﹕「學校同家長一直都好關注學生既營養，所以學校訂購既午膳都要符合教育局指引。近來有好多人都o係街上派免費食物，搞到學生掛住周街拎埋d零食，返到學校都唔食飯。最近仲有人當街派糖添﹗咁樣唔單止令學生食得太甜，增加患糖尿病既機會，而且學生仲會帶埋返學校，擺o係課室惹蟻惹甴曱。呢d免費食物唔單止冇營養，仲會製造好多問題，所以有不少學校都會禁止學生帶免費食物回校。」
謝﹕「請道德重整會會長海至深發言。」
海﹕「免費食物既本質係乜野﹖就係不勞而獲。鼓勵大家不勞而獲係好錯的，無代價就唔會記得粒粒皆辛苦，隨意浪費。最嚴重既問題係呢d免費食物，仲要加糖，刺激客人既食欲，令人沉迷甜品，日久傷身而不自知。免費食物對小朋友既毒害尤其大，原本呢d多糖既食物，都係要畀錢先買得到既，家長都仲可以控制得到。依家周街派，你叫d家長點阻止到細路食甜野﹖我地認為政府有必要去監管呢d免費食物。」
謝﹕「我地先請食品製造商協會主席梨志櫻回應一下，之後再到台下觀眾發言。」
梨﹕「香港係一個自由市場，你鍾意免費派食物又得，一舊黑松露賣到幾十萬都得。依家食品市場正在轉型，隨街免費派既食物越黎越受歡迎，除左有贊助商肯o係包裝上落廣告，亦可以免費試食吸引食客長期購買。食品行業一定要轉型，免費食物和收費食物二分化，收費食物會走向精緻同更有營養，先可以吸引到更多既食客。政府對食物添加劑係有規管既，製造商根本唔可能會落得太多，多左會畀人告的。家長同老師應該教學生多d均衡飲食，我地冇叫佢地淨係食免費野架。」
謝﹕「好，我地去一去廣告先。返黎到台下觀眾發言。」
---
謝﹕「食市論壇第二節，題目係『免費食物要妥當，大眾齊論保周詳』，依家到台下發言。請問有邊位想發言先﹖(眾舉手) 好，你先，請發言者報上學校或機構名稱。」
觀眾甲﹕「我地係飲食自由關注組既。我地想問下蔣生，佢話唔畀學生帶免費食物，呢個係教育界應該有既態度咩﹖你地唔係應該去教學生認識營養，然後自己揀適合既食物﹖一刀切咁唔畀學生帶免費食物返學，根本上就係反教育既。阿海生仲話要政府規管添﹗政府樣樣都管，係咪想香港變成共產社會呀﹖﹗」
海﹕「我地支持共產社會﹖共產社會大鑊飯，就真係免費任食啦﹗」(眾噓)
謝﹕「關於教育政策呢方面，我地有邀請過教育局派代表，但佢地話冇人得閒黎。(眾笑)
蔣生有冇回應﹖」
蔣﹕「學校一直都有依照政府既『食教育指引』去推行營養教育既，而且o係學校小賣部都有各式既食物供應，都係由學校監管的。至於唔畀學生帶免費食物返學校既原因，先前都提過係因為佢地掛住食零食唔食飯。學校一向都係要求學生只帶同學習有關既野返學，呢d零食對學習無益，所以我地都係唔贊成佢地拎返學勒。至於家長方面，我地亦希望同佢地合作，一齊教學生選擇合適既食物。」
謝﹕「跟住我會畀學生發言，呢一位啦。」
學生乙﹕「大家好，我係杏壇中學既學生。蔣生，你話唔畀學生帶免費食物回校，係咪會令到基層家庭、冇錢既小朋友食唔飽﹖同埋你叫學生食小食部既野，雖然佢地賣既野唔會糖份過高，但係落好重鹽喎﹗仲有好多煎炸食物添，咁又唔影響健康咩﹖」
謝﹕「蔣生有冇回應﹖」
蔣﹕「對於基層既小朋友，學校社工係會幫佢地申請綜援，亦有食物銀行服務，係唔會因為唔o係街上拎免費食物就食唔飽的。至於小食部方面，都係根據政府指引去監管既，我地亦一直照指引去教學生選擇適當既食物。」
謝﹕「果位阿叔想發言，同事畀個咪佢。記住講野唔好離題，唔該。」
阿叔丙﹕「計我話呢，呢個梨志櫻呀，根本就係民族敗類﹗你睇佢畀咁多錢d反對派，仲要畀埋果個主教接濟果d乜鬼地下教會，o係度反中亂港……」
謝﹕「o拿，我話左唔好離題架下。梨生有冇回應﹖冇。咁我畀學生多一次發言。」
學生丁﹕「大家好，我都係杏壇中學既學生。我想問下海生，你口口聲聲話免費食物加甜會食壞人，咁你又知唔知道，老M一個甜筒都只係兩個半呢﹖學生一樣可以買十幾個甜筒然後唔食飯架喎 (眾大笑)。仲有，之前已經有同學講過，就算學校d食物，都係多鹽多油，點解呢d野又冇人留意，你地淨係留意甜野架咩﹖(眾笑)」
謝﹕「海生有冇回應﹖」
海﹕「我地一路都好關注食物含糖量既問題，一路都要求政府所有甜野食都要包膠袋，同不可向十八歲以下青少年售賣既，呢個係一貫立場。甜野係特別容易食壞人的，香港咁多人糖尿病，你有冇聽過鹹尿病同油尿病﹖鹽同油自有其他組織去關注。」
觀眾乙﹕「大學生整糖水你就識報警﹗又唔見你地去老M門口抗議﹖﹗」(眾歡呼)
謝﹕「觀眾請冷靜﹗青年飲餞聯既代表有冇打算發言﹖(點頭) 咁你講啦。」
代表戊﹕「我地都好關注食物太甜既問題。其實咁多甜野通街派，家長真係唔知點樣教仔女唔拎的。好多家長都同我地反映，話如果可以監管一下免費食物既含糖量就好……」(眾大噓)
謝﹕「大家畀人講埋先啦﹗青年飲餞聯你地仲有冇野講﹖冇既我地下一節返上台上。」
---
謝﹕「食市論壇第三節，題目係『免費食物要妥當，大眾齊論保周詳』，依家我地畀台上嘉賓總結，每人三十秒時間。」
蔣﹕「我地關注免費食物對衛生同營養帶黎既影響。希望家長、社會同學校一齊合作，教導學生選擇適當既食物。我諗政府要多d宣傳，話畀學生聽食得太多甜野既壞處。」
海﹕「免費既問題係好大，加埋糖份既問題就更大。我地要畀青少年有一個健康成長既環境，就要監管呢d高糖份食物既去向。前排保安局o係學校開展左驗尿計劃，我地可以參考佢地驗糖尿既經驗。」(眾又噓)
梨﹕「其實糖份冇乜好驚丫，飯都有糖份架﹗你含啖飯o係口度多一陣都有甜味架啦 (眾笑)。我地一直都係按照法例做野既，業界亦一直同政府、社區合作去教大家選擇食物。不過如果政府呢樣又管果樣又管，你地就要諗下係咪想第日乜都冇得食啦。」
吳﹕「我地始終希望市民唔好因為免費就拎得太多，搞到食唔晒咁浪費啦。從環保角度睇，糖份高都未必係大問題，你放o係屋企頂多係惹螞蟻甴曱o者，佢地都會幫你食左佢。反而係如果太多油同鹽，d鹽不單止連螞蟻甴曱都醃死埋影響生態，就算拎去做堆肥油份太多都做唔到。所以最重要既原則，始終都係你食得落幾多先拎幾多。如果可以的話，食多d有機食物對地球生態更有益啦。」
謝﹕「好，多謝各位收睇今次食市論壇。相信市民會繼續討論我地需要點樣既免費食物，令食物質素繼續進步既。我地下星期o係上海街熟食中心再見。」
沒有留言:
發佈留言