司書伽利略

(註﹕訓唔著時胡思亂想之作，注定有頭無尾，勿望下集)

—

一對穿著整齊套裝、英姿煥發的男女CID站在東九龍某中學門前。Madam向門口保安先開聲道﹕

「您好﹗我地係西九龍重案組，黎搵湯Sir既。」

Madam和阿Sir在更亭的訪客簿填下資料，保安姐姐用對講機向校務處複述一遍，然後對Madam說﹕

「唔該晒﹗兩位請沿前梯上二樓丫﹗」

兩位幹探不知道的是，校務處的人隨即把「有重案組CID搵湯Sir」的事傳遍教員室。

—

兩位CID終於上了樓，到了圖書館門前。阿Sir一推開門，就見到門邊有個類似秘書的女士坐在櫃檯電腦面前在輸入甚麼的，一眼望進去有不少學生在自修(或睡覺)，就是望不到湯Sir。

Madam似乎很急於表現，立即就問那位女士﹕

「我地係西九龍重案組既，請問湯Sir o係邊度﹖」

女士隨即起身走向櫃檯另一端，兩位CID就跟著這位女士的腳步移動。女士向著書架那邊呼了一聲﹕

「湯Sir，有阿Sir同Madam搵你。」

書架就是櫃檯的對面，先前CID的視線剛好被書架擋住了，兩位CID的頭望向書架後面。這時候所有自修(而未睡著)的學生都望過來，除了他們之外，就是「傳說中的湯Sir」了。

Madam一直很好奇阿頭(即係帶她到這裡的阿Sir)口中的「怪人圖書館老師」是甚麼樣子。不過直至望到這一眼，令她非常失望。

根據香港人的行規，做教師這一行的人普遍都有個「教師樣」，這位湯Sir也不例外。穿著一雙陳舊黑皮鞋、有如學生校服褲的灰西褲(幸好這所中學的校 服褲不用灰色，否則就跟學生毫無分別)、一件白色加藍格子的恤衫、一頭不長不短，明明梳過又被風吹得四散，一點也不飄逸有型的頭髮……總之就是……一個教師啦。

看倌或者好奇，為何Madam看人會由腳看起﹖

因為湯Sir正是以很像自由行遊客的姿勢蹲在地上。在他前面的地上攤開了一本書，他大腿之間攤開了另一本，而他的手又正在書架上拿起另一本。當湯Sir聽到女士的叫聲，抬高頭一望，缺乏蹲地習慣又缺乏運動的老師雙腿蹲得不穩，整個人搖晃起來，就連腿上的書都跌在地上。

旁邊自修的學生當中傳出隱隱的恥笑聲。

湯Sir一邊把地上的書本塞回書架，一邊眼也不望兩人說﹕「阿草你又有乜事﹖」

Madam直到這一刻才知道原來自己阿頭曹Sir有這個花名。

由於屢破奇案，曹Sir在警署裡是明日之星，Madam自己剛剛獲批加入CID，亦以跟隨曹Sir為榮。眾多上司也很器重他，雖然曹Sir現在是高級督察，但上司當中甚至有傳言說曹Sir終有一天會當上助理處長，所以警署的其他人只會戲稱他為「曹探長」。的確只有他的中學同學，才會直接叫他的花名。

曹Sir笑著跟湯Sir說﹕「出去同你傾傾啦。」

湯Sir終於收拾完書本站起身來，原來看來蹲也不穩的病壞書生，站起來也不矮。Madam堪稱重案組之花，身高跟陳敏之毫不輸蝕的她同樣有一雙長腿，湯Sir站起來比她高半個頭。

湯Sir應了一句﹕「唔慌有好野啦」就跟曹Sir和Madam走出去。

有個學生嬉皮笑臉多事一問﹕「湯Sir你係咪隨街爆粗畀人拉呀﹖﹗」

原本應該很安靜的圖書館，眾學生突然爆笑起來。

湯Sir倒也不慌不忙，回頭應了一句﹕「如果真係要拉人爆粗，第一個黎拉你啦。」

眾學生又笑。
不用說，這一定是個經常爆粗的學生。

—

三人走出圖書館門外，眼前走廊之下還有一批學生在操場上體育課跑跑跳跳。

湯Sir 擺出一副因為有人來麻煩他而不悅的樣子，但說話的語氣卻又一點也不像介意似的﹕「我明明三不五時就o係FB出post鬧警方濫權，都唔知點解你到依家都未block我既。」

曹Sir嬉皮笑臉地答﹕「車，咁多年朋友點會為D咁少事block你架﹖果個『十like王』見乜都like咁煩，你都未block佢啦。何況你明知我不嬲都唔贊成對付示威者架喎，如果聽日我做處長頂多畀交響樂你地聽架o者，嬉嬉。」

(Madam心想﹕原來曹Sir真的想過做處長……)

湯Sir立即盯著曹Sir連珠炮發﹕「你黎煩我仲要蛋撻都冇盒，都算勒。唔好咁大聲話自己係差人好嗎﹖聽日應該由校長到校工到學生都會以為我爆粗畀重案組捉去查。」

曹Sir繼續笑著說﹕「係人都知你鬼咁斯文唔爆粗架啦，最多我用人格向你校長擔保勒。你講得『算』我當你應承幫我架啦。」

Madam心想，原來曹Sir不只對著街頭古惑仔才會耍無賴的。

湯Sir繼續口不饒人﹕「乜你都有人格架咩﹖喂我份糧係教育局，唔係保安局出架喎，你就要我出教育局既糧幫保安局查案。枉政府上年仲話要加線人費，我幫左你咁多次，連一蚊線人費都冇收過呀。」

曹Sir﹕「線人費係畀D古惑仔同道友既，你唔係『線人』丫嘛。蛋撻就下次我黎果陣買一打畀你又點話。」

Madam望望湯Sir的肚腩，那麼喜歡吃蛋撻的病壞書生竟然還沒有大肚腩﹖

湯Sir察覺到Madam在目測自己的肚腩，回應曹Sir說﹕「我食得幾多個﹖唔怕塞血管呀﹖你買十打我咪又淨係食得一個然後請同事學生食﹖」

Madam似乎覺得這兩個同學在吹水也吹夠了，向曹Sir示意了一聲﹕「阿頭……」

曹Sir這時候突然記起﹕「係喎我都唔記得介紹，呢位係新加入既Madam徐，第日會幫我同你聯絡，你會成日見到佢架啦。呢位湯Sir，就係我講果位乜都搵得到既中學同學。」

於是湯Sir和Madam兩人互相點頭示意。

湯Sir突然對著曹Sir目露鄙夷視線﹕「咪住﹗你頭先話『下次你黎果陣』就買蛋撻，依家就話搵個Madam黎聯絡，即係以後都唔使買蛋撻啦﹗」

曹Sir笑著說﹕「哈哈……你咁多年黎都係咁咬文嚼字既﹗我叫佢記得買啦好未﹖我係諗住益你先特登搵重案組之花黎同你聯絡架。」

久經訓練的Madam在曹Sir笑眼角落看到一絲被識穿的無奈，他的確是打算耍無賴，現在只不過是以笑遮醜。看來蛋撻她不買不成，但曹Sir大概不會科水的了。
不過既要曹Sir提攜，又看著曹Sir經常「萬歲」的份上，她暗下決定，反正這人也只會吃一個，以後就買半打蛋撻啦。

湯Sir大概沒看出甚麼(又或者想起「重案組之花」也不錯決定不追究)，立即入正題﹕「今次又有乜事﹖我仲有一堂時間畀你，跟住放學我就唔得閒理你架啦。」

曹Sir﹕「你唔係有班學生幫手既咩﹖」

湯Sir﹕「你估你同我讀書果陣呀﹖依家D人唔係無尾飛砣就係諸多活動，有人黎都偷笑。我做圖書館主任仲要做埋組員果份。」

曹Sir﹕「咁我地快D入正題啦下。」示意Madam講述案情。

Madam心想，他們吹了那麼久，終於肯入正題了……為免有人反悔，立即就開足全力開始講案情……

(下集)