星期六, 11月 12, 2016

與親建制同工論愛國與港獨

因為引用區家麟篇文,同親建制同工拗起港獨同愛國既問題。佢既意見係典型藍絲意見,無足道也。倒是自己的回應,覺得可以整理一下留個記錄。
1. 論梁游宣誓事件
如果港獨真係冇可能,共產黨就唔會暴跳如雷。唔通我同你講要香港仔獨立你又嬲一餐﹖冇人會理「香港仔獨立」,因為知道冇可能。佢要打港獨,就係因為驚有可能。
N年前我已經介紹過呢本書,一個唔會支持港獨既大中華左翼寫既。而佢正正話你知,共產黨係好忌憚香港既獨立能量。呢度講既獨立唔係搞港獨,而係獨立於共產黨、不受大陸控制既能量﹕
香港的殖民地幽靈—從殖民地經驗看今天的香港處境》劉紹麟,香港﹕守沖社,2005
成本書分析左好多中港矛盾成為死症既深層因素。真正好睇,真心推介。
話「廢青」冇家冇國冇民族自己大晒,有邊個夠共產黨冇家冇國冇民族自己大晒﹖(要子女批鬥父母,係咪冇家﹖分裂中華民國,係咪冇國﹖大革中華文化之命,係咪冇民族﹖連活佛都要敬拜毛澤東,係咪自己大晒﹖)有邊個夠共產黨恐怖﹖
共產黨我地都對左咁多年啦。相對黎講,呢班細路都只係小學雞。
你問我鍾唔鍾意班小學雞﹖唔鍾意架。
熱普城果班我更憎,點解﹖就係因為佢地D思維模式似共產黨。
越係要打壓,班年輕人越係會支持港獨。大家都做呢行,唔會唔知道年輕人有叛逆心理架﹖
所以西環果班友好「成功」架。明明回歸時都冇人搞港獨,佢地就日鬧夜鬧,連班話要民主中國既大中華泛民都話係港獨。結果班細路聽得多,就一不做二不休,反正係咪都畀你話港獨,不如乾脆就搞港獨。
如果話港獨運動裡面邊個係鬼,梁游二人係咪鬼我暫時唔知,但最大既鬼肯定就係共產黨。
2. 論仇恨蒙蔽人心
仇恨蒙蔽人心﹖係架,但係成個大環境係邊個造成﹖邊個有權可以控制成個大環境﹖
早年中港有衝突,大陸傳媒都是「河蟹」處理。後來就轉為不停宣傳香港人歧視大陸人(佢地有幾霸道又唔提)、香港受了國家很多恩惠之類(拜託買水還貴過新加坡向大馬買,恩惠﹖),這些中共控制的傳媒究竟想在大陸民眾心中播下甚麼種子﹖是誰不想中港矛盾衝突降溫﹖
一隻手掌拍不響的。尤其對面那隻還要大到天殘掌一般。
我成日同人講,要保護本土,矛頭對準政權就好,唔好玩族群政治,將某D大陸人既問題當成所有大陸人既本質。呢種諗法,依家叫「左膠」,因為大家相信大陸既人畀黨媒民族主義大國崛起洗晒腦冇得救,不如一刀兩斷算數。
見到中港人民互相仇恨,背後玩弄仇恨玩分而治之既人最高興,因為咁樣中港人民就冇可能再好似1989年咁團結對抗政權了。
3. 論反中憤青乃失敗者、背靠祖國
你覺得啫。呢D人我識一班平日返工既、公務員都有,大把人人工高過我,仲有人結婚生埋仔。講失敗我應該失敗過佢地。(你話唔好非黑即白嘛 :P )
如果你叫佢地「唔鍾意共產黨咪移民囉」,我估佢地會答你「睇我地唔順眼咪移民囉」。
如果你諗「點解我要走﹖」佢地諗法一樣。
冇得背靠祖國實死﹖李光耀當年都咁諗既,佢都覺得新加坡獨立冇左馬來西亞做腹地死硬,所以被迫獨立果陣佢上電視台講講下流晒眼淚。結果,依家獨立五十周年。佢死埋新加坡都未死。
事實係,香港之所以變東方之珠,唔係因為畀「祖國」統治。偏偏就係因為唔畀祖國統治,先可以做到中國同世界既橋樑。香港不嬲都係食呢條水,而唔係靠「祖國」照顧。
中國收番一個國際港口之後會變咩樣﹖其實民國時代已經有例子,果個叫威海衛。依家除左讀中史仲有邊個記得威海衛﹖
另一好書推介﹕鄺健銘《港英時代—英國殖民管治術》,香港﹕天窗,2015
所以,要香港好中國好,歷史話畀你聽最好就係共產黨唔好統治香港。咁香港人反而會更加愛中國(好似英殖時代咁)。香港自認係中國一部分當然冇問題,但當中國伸手黎搞香港果陣,香港就會好似威海衛咁慢慢死,正如依家。
4. 論民主、獨立與愛國
香港係中國一部分,係咪事實,視乎乜野時間。秦漢之前就唔係,如果講粵人漢化就到宋明都未認真係。割讓英國果百幾年亦唔係。
當然「現在」香港係中國一部分。如果果班人唔承認呢個事實,邊會有人叫港獨﹖直頭好似台獨班友咁,話「中華民國就是台灣,早已獨立」啦。
喺一個民主國家,要求獨立絕對唔係乜野叛國行為(起兵叛亂先算)(方按﹕就算香港現行法例甚至當年廿三條草案都係一樣原理)蘇格蘭魁北克都公投過(最後唔獨)。加泰隆尼亞話公投,西班牙政府唔承認,但亦冇話要拉要鎖。
就算美國都有堆地方有人成日出黎遊行話要獨(如夏威夷,甚至德州,南方亦有大把人唔服南北戰爭打輸,日日掛南方叛變既「美利堅邦聯」旗幟出黎),政府都冇理。
甚至佛羅里達州Key West群島曾經嫌「路障太多」於是封鎖道路宣佈獨立,亦冇兵出警察去拉人。而係州政府同居民開會傾,最後傾掂數重開道路。依家佢地仲會慶祝自己既「獨立日」。冇人會大吵大鬧話佢地唔愛美國。
當然最新仲有加州人不忿侵侵勝選,重提獨立運動。我們可沒聽見奧巴馬—甚至那個狂人侵侵—跑出來說甚麼「那些是不愛美國的美奸,絕不容許分裂美國國土」。
因為民主國家,國家既認受係靠人民自行認同。人民唔認同你,你根本冇資格統治佢地。
而中國就唔係一個現代化正常國家,佢只係一個「黨國」(民國解嚴之前亦一樣),國家係屬於「黨」,唔屬於你同我。你同我都只係「臣民」唔係「公民」(因為身為國民根本冇公民權利)。佢聲稱代表你同我,但其實冇呢個權去代表,因為我地冇授權畀佢。就算你想支持佢,都冇機會授權佢。

講到尾,所謂「港獨」成風,都只不過係出自香港很多人不欲中共統治的希望。發現「民主拒共」失敗之後,於是出現更激進的反應而已。我敢斷言,假如中共不收回香港、甚至就算只是像回歸初年般保持克制的話,港獨只會是幾個人飯後吹水的題目,根本炒不起來的。
中共本身亦很清楚這一點,所以就算當年要求民主普選的是一班愛國愛到跑在政府前頭搞保釣的大中華泛民,都已經屈你係「港獨」。就算藏區想學香港一國兩制,佢都話係藏獨。因為對中共而言,唔受佢管等於獨立。哪怕佢會管死香港,佢都唔會放手畀你自己管自己。呢個係獨裁政權既本質,同香港產生衝突亦係其本質所註定。
一個只屬於「黨」擁有既國,要求人地「愛國」,仲話唔想受佢管既人係「叛國」,只係笑話。
如果咁都得,李嘉誠都可以要求我地「愛長實」,唔想幫襯佢既人就係「叛和黃」了。 XDD
要追究唔愛國,去追究毛澤東先啦。毛澤東本人話湖南要獨立、仲話中國「最好分為二十七國」(唔信自己去搵下)。國民黨至少都肯搞國民大會普選,共產黨就起兵背叛中華民國。最大既叛國團伙你都唔敢叫佢收檔,淨係敢鬧果兩條冇人冇物既死靚仔死靚妹,學咩人講愛國﹖呢D叫欺善怕惡啫﹗

沒有留言: