analysis

星期六, 12月 08, 2018

炒冷飯系列之食.戒

(向史兄致敬,開個系列放下以前的有趣作品)
(原文在此,2008年作品)

[食.戒]

(午飯時間的學校)

陳sir﹕「麥丙﹗你做乜野﹖﹗」(飯堂裡的女生全望出來)

麥丙﹕「我……執返雙筷子之嘛……」

陳sir﹕「由男生飯堂跌筷子跌到黎女生飯堂﹖你當我傻架﹖﹗跟我去見何sir﹗」

 - -

(放學後的會議室)

校長﹕「各位老師,大家都知道最近發生了藝人飯照事件,教育廳剛剛出左一個『慎言、慎思、慎行 - 網上飯局照片事件』教材套,我地希望下星期晨讀時間,分發俾學生做討論。」

……

何sir﹕「我補充一下,今日岩岩就有個男生o係午飯時間,潛左去女生飯堂偷窺,好彩俾陳sir發現。學生當藝人係偶像,今次飯照門事件帶黎好壞既影響,令佢地躍躍欲試。希望各位老師下星期以開放既態度與學生討論,俾佢地可以暢所欲言。但如果個別學生表現有問題的話,請與輔導組聯絡跟進。」

校長﹕「我地o係下星期會 1. …… 2. …… 3. ……」

林sir﹕「我地輔導組亦已經聯絡左駐校社工,黎緊呢兩個星期會分別為各級舉行講座,討論有關食飯既禮儀同道德問題,教導佢地唔好亂食野既重要性。而魏sir原訂o係下個月邀請警民關係科警長向學生講解飲食犯罪問題講座,俾學生知道食飯既法律責任,會如期舉行。」

校長﹕「各位同事,如果冇問題既話,可以散會。」

 - -

(麥家廚房)

麥丁﹕「點解我地呢個星期都唔可以o係廳食飯﹖」

麥媽﹕「妳大個女啦嘛﹗唔可以同男仔一齊食飯架啦。我都為左陪妳,所以冇同阿爸一起食啦。以後我都會陪妳o係度食飯架啦。」

麥媽﹕「仲有呀﹗妳依家大個啦,唔好亂咁同男仔一齊食飯呀。唔係好似班明星咁俾人影左相,妳就唔使旨意嫁人啦。」

麥丁﹕「哦。」

 - -

(麥家客廳)

麥爸﹕「阿丙,頭先阿媽同我講,話老師捉到你偷睇女仔食飯喎﹗」

麥丙﹕「冇呀……都話係誤會囉﹗阿sir死都唔信。」

麥爸﹕「總之你唔好搞d咁既野影衰全家呀下﹗老師冇教你『瓜田李下,事避嫌疑』呀﹖搞到要記過貪韾香呀﹖信唔信我同阿媽cut晒你d零用錢丫o拿﹗」

麥丙﹕「……」

 - -

(麥家客房)

收音機﹕「疑似藝人食飯照片案件有新進展。今日警方宣佈成功拘捕一名無業遊民古也地,涉嫌在網上發佈疑似藝人食飯既照片,觸犯《飲食物品管制條例》。因為古也地拖欠大量卡數,控方反對被告保釋,以防被告以照片勒索當事人。裁判官表示接納控方要求,被告還押兩星期候審。

「公安廳長o係記者會上表示,任何人藏有食飯照片,都可能犯法。法王公司代表表示,市民為免犯法,應該儘快刪除有關照片,亦不要傳給他人。」

星報o係前日將有關照片呈交飲食物品審裁處評級,飲審處將於下星期展開聆訊。以下係另一段新聞……」

麥丁﹕「喂,阿哥,借d功課黎『抄考』下丫。」

麥丙(發晦氣)﹕「冇呀﹗」

麥丁﹕「你唔借俾我,信唔信我話俾阿爸阿媽聽,你部腦收埋百幾張食飯相丫拿﹗」

麥丙﹕「(誇張地)我好怕呀﹗妳冇份睇呀﹗妳慌阿爸阿媽唔係o係房睇緊﹖」

 - -

(麥家主人房)

電視﹕「跟住播映《同學三分親》……揭示動物覓食生態,高清紀錄片《飲食雄雌》將於八點半暗淚台播出。」

麥媽﹕「講﹗你有冇睇過d明星食飯相﹗」

麥爸﹕「冇呀……」

麥媽﹕「算你啦衰佬﹗」

(麥爸把一隻DVD放到碟機)

麥媽﹕「你做咩呀﹖我追緊劇架。」

麥爸﹕(樣衰地)「我好辛苦先買到林過暈果隻《過暈飯局》,一齊睇啦﹗」

麥媽﹕「衰佬﹗我冇煮飯俾你食呀﹖有咩好睇呀﹖﹗」

麥爸﹕「妳依家為左陪個女,都冇陪我食飯啦﹗一齊睇碟都得掛﹖」

麥媽﹕「家陣好委屈你咩,我都係為個女o者﹗」

麥爸﹕「等幾多年先到佢嫁人﹖之後十幾年我都淨係同阿仔食飯﹖」

麥媽﹕「最多我一陣淥個即食麵孖你當宵夜勒﹗」

 - - - - - - - 

(本故事純屬虛構)

沒有留言: